Я вельмі люблю ўсякія метрыкі, лічбы і статыстыку. А сёлета неяк так выйшла, што заліваю ў Instagram тону кантэнту — фоткі (нават штодзённую серыю завёў), крынжовыя рылсікі, усё запар. Зараз сярэдзіна года, і захацелася азірнуцца: што зайшло, а што не, што наогул сабрала водгук, а што паляцела ў пустэчу.

Гатовага бясплатнага інструмента пад гэта я не знайшоў. Але мы тут не лыкам шытыя: ёсць ідэя, інструменты, крыху ведаў і ШІ пад рукой. Значыць, пішам свой скрыпт.

Ідэя: скрыпт замест здагадак

План быў просты: схадзіць у інсту, выбраць усе пасты за патрэбны перыяд і сабраць па іх лайкі, каментары, захаванкі. А калі атрымаецца — яшчэ і зразумець, адкуль прыйшлі людзі: свае падпісчыкі ці новыя.

Першы блін

Накідаў першыя версіі — і стала сумна. Куча графікаў, прыгожа, але незразумела, што з гэтым рабіць: даныя ёсць, а высноваў нуль.

Зразумеў: праблема не ў колькасці даных, а ў тым, што ўсе пасты ляжаць у адной кучы. Падзяліў па тэмах — што на фота: лес, вада, партрэт, веласіпед. І вось тут стала цікава. На аснове гэтых катэгорый з’явіліся параўнанні (што заходзіць лепш за сярэдняе, а што слабей), маленькія прадказанні і сумленныя высновы — што працуе, а што не.

Галоўны экран інструмента: зводка з высновамі што працуе і што не
Галоўны экран — што працуе, што не, і план на тыдзень.

Катэгорыі — аўта, але праўлю рукамі

Катэгорыі прастаўляюцца самі, па карцінцы і подпісе. Але скрыпт не заўсёды ўпэўнены — дзе сумняваецца, пазначае пост «праверыць», і я дакідаю рукамі: тэму, тып (фота / карусель / reels), колькасць кадраў. Ручныя праўкі заўсёды галоўнейшыя за аўтаматыку і перажываюць любую перазборку — так што адзін раз паправіў, і ўсё.

Экран праверкі катэгорый: аўта-разметка і ручная праўка
Экран праверкі: катэгорыі прастаўлены аўтаматычна, але любую можна паправіць рукамі.

Што ў выніку атрымалася

Стала відаць, хто прыводзіць новых людзей — па тэмах і фарматах:

Графікі: хто прыводзіць новых людзей па тэмах і фарматах
Хто прыводзіць новых людзей — па тэмах і фарматах.

Тыя самыя графікі нікуды не дзеліся — проста схаваў іх пад «Падрабязнасці», каб не мазолілі вочы. Хочацца пакапацца — яны на месцы:

Графікі тэм па ахопе і захаваннях
Тэмы па ахопе і захаваннях — для тых, хто любіць пакапацца ў лічбах.

І табліца ўсіх пастоў: сартуеш па ахопе, лайках, каментарах — і проста глядзіш вачыма, што агульнага ў топаў:

Табліца ўсіх публікацый з сартаваннем
Усе публікацыі ў адной табліцы — сартуй і параўноўвай.

А калі запусціць збор яшчэ раз праз пару дзён, відаць, як пасты дабіраюць сваё: дзе колькі прыбавілася ахопу і лайкаў паміж замерамі.

Дынаміка метрык паміж двума зборамі
Што змянілася паміж двума зборамі — адразу відаць, хто яшчэ расце.

У выніку атрымаўся асабісты прыкольны тул, у які можна заліпнуць. Не «сапраўдная аналітыка», а хутчэй цацка пад сябе. Здымаю я ўсё роўна тое, што падабаецца і адгукаецца ў моманце. Але цяпер разумею, што з гэтага працуе і чаму — і гэта ўжо нешта. Пра яснасць, у агульным — як і каляндар жыцця: менш шуму, больш разумення.